Retningslinjer for Fritidskasse i Vestre Slidre

Frist for å søkje

Tilskotet frå Bufdir gjeld for 2025. Søknadene blir behandla fortløpande, så lenge midlane rekk kvart år.

Kort om tilskotet

Formålet med tilskotet er å leggje til rette for at alle barn og unge skal ha moglegheit til meistring og deltaking i ei meiningsfull fritid. Tilskotet går frå ein lokal fritidskasse som bidreg til å dekkje kostnader knytt til deltaking i organiserte fritidsaktivitetar.

Målgruppe

Barn og unge i alderen 6–16 år som av ulike grunnar står i fare for å hamne utanfor fellesskapet.

Kva kan det søkjast om

• Deltakaravgift i kultur- og idrettsforeiningar for inntil eitt kalenderår (klubbavgift, treningsavgift).
• Reise til/frå og deltakarkontingent for kultur- og idrettsarrangement (cup-/turneringsavgift).
• Nødvendig utstyr og klede.

Det blir dekka utgifter for inntil 3000 kroner per barn/ungdom i året.

Kriterium for å søkje

• Barnet/ungdommen er folkeregistrert i Vestre Slidre kommune.
• Barnet/ungdommen bur i ein familie med låg inntekt som ikkje sjølv har høve til å dekkje utgiftene til fritidsaktivitet.
• Gjelder barn, ungdom frå 6-16 år.
• Aktiviteten det blir søkt om tilskot til, er ein organisert fritidsaktivitet.
• Det kan søkjast om éin organisert fritidsaktivitet per barn per år.
• Søknaden gjeld eit konkret barn/ungdom.

Kven kan søkje

Ein kontaktperson frå laget/foreninga kan søkje om støtte på vegner av barnet eller ungdommen det gjeld.  

Privatpersonar kan ikkje søkje sjølve. Søknaden skal ikkje innehalde personlege opplysningar.

Slik søkjer du

Det aktuelle laget/ foreininga fyller ut skjemaet.

Det må leggjast ved dokumentasjon for utgiftene i søknaden. For utstyr er det til dømes tilstrekkeleg med skjermdump frå ei nettside som viser pris. For deltakaravgift vil skriftleg stadfesting frå aktuell organisasjon/lag/foreining vere tilstrekkeleg. For støtte til deltaking på cup/turnering/treningsopphald, vil ei invitasjon som viser kostnad vere tilstrekkeleg.

Oversikta over godkjend dokumentasjon er ikkje uttømmande, og det er sakshandsamar i Vestre Slidre kommune som vurderer om dokumentasjonen er tilstrekkeleg.

Etter du har sendt søknaden

Sakshandsamar i Vestre Slidre kommune gjer ei skjønnsmessig vurdering basert på innsend dokumentasjon og innanfor dei rammene som er fastsette.

Sakshandsamar i Vestre Slidre kommune står fritt til å godkjenne eller avslå heile eller delar av søknaden på objektivt grunnlag.

Svar på søknaden

Svar blir sendt til ansvarleg søkjar så snart søknaden er behandla.

Utbetaling

Organisasjonar/lag/foreiningar får utbetalt fortløpande etter søknad.  

Klage

Du kan klage dersom du har fått avslag på søknaden. Send klaga på e-post til post@vestre-slidre.kommune.no seinast tre veker etter at du har motteke vedtaket om avslag. Det er viktig at klaga ikkje inneheld personlege opplysningar.

Kontaktinformasjon  

Torill Trøen, leiar for kultur og frivilligheit  

e-post: torill.troen@vestre-slidre.kommune.no

Ingrid Aaberg, rådgivar oppvekst  

e-post: ingrid.overholt.aaberg@vestre-slidre.kommune.no