Nærare 120 millionar menneske er på flukt frå krig og konflikt. Aldri før har så mange hatt behov for hjelp til å skaffe seg ein heim. Men det finst håp, og det finst løysingar. TV-aksjonen 2026 skal bidra til at over 400 000 menneske får tryggare og betre buforhold i Syria, Gaza, Afghanistan, Tsjad, Sudan og DR Kongo.

Pengane skal gå til telt og andre naudbustader, mellombelse og permanente heimar, vatn- og sanitærprosjekt og juridisk hjelp for å sikre bustad- og eigedomsrettar.

Ein heim er meir enn fire veggar og eit tak

Å vere på flukt betyr å stå midt i ei djup krise. Livet slik ein kjenner det, blir snudd på hovudet. Menneske som blir tvinga til å flykte frå krig og konflikt, har ofte opplevd store tap; mange har mist familiemedlemmer, jobb, utdanning og det sosiale nettverket sitt. Ofte må dei forlate heimen sin med berre det dei klarer å bere med seg, utan å vite om, eller når dei kan vende tilbake.

Ein heim er meir enn fire veggar og eit tak. Han gir tryggleik, vern og ein stad å høyre til. Når familiar får ein stad å bu, blir det også lettare å finne arbeid og sende barna på skule. Slik kan kvardagen bli meir stabil, og grunnlaget for ei ny framtid kan byggjast.

Meir informasjon om årets TV-aksjon finn du ved å trykke her.